စရာဲၜိုပ်တၟိ

ယိုက်ဂုဏ်ရတ် နကြိအဲလ္ၚောဝ်၊ မိမအ္စာပြဲ တဲၜါကယျောဝ်၊ စိုတ်ဂွုလမောဝ် လ္ၚောတ်ဏာဖအိုတ်၊
လ္ၚောတ်တုဲအဵုဇိုတ် ၜိုတ်ချူလၚ်္ကာ၊ ဖဵုအဲလ္ၚောဝ်ပ္ဍုန် ဂုဏ်ညးတံကၠာ၊ ဗီုအဲမိက်ဇန် ဇၟန်ဒွက်လၚ်္ကာ၊သၟိက်အဲချူဆက် ညံၚ်ပၞောန်ဗက်အာ၊ ဗီုအဲမိက်ဒှ် ကဵုဒှ်ဇၟာပ်ကာ၊ နဲလိက်ပတ်မန် ဖေက်ကၠေံဗ္ဒန်အာ၊ မိက်ဂွံမံက်ဂ္တဝ် အံသဝ်စိတ္တာ၊ နဲကယျဟ်မိ စိစောန်ဟွံသာ၊ ဗှ်လေဝ်ကလိတ် စိုပ်သိတ်ပြာထာ၊ ဟိုတ်ဂှ်ရန်လဝ် ပတဝ်ချူဏာ။
အဲဒှ်ကေါန်မန် ရးမန်ခန်လွာ၊ ကွာန်တိုပ်သုက်အဲ ပ္ဍဲရးမညာ၊ အဲဂှ်သွတ်လောန် အောန်ကဵုပညာ၊ ဗျုညံၚ်အနော် သော်သ္ကံဟွံသာ၊ ဟိုတ်သော်သ္ကံသာ ဝါသၞာဗျုအာ၊ ညံၚ်ညးဇၞော်ထၟိက် မိက်ချူလၚ်္ကာ၊ လၚ်္ကာအဲဟေၚ် ဗၠေတ်ဗၠေၚ်ဒှ်အာ၊ ကောန်မန်လ္ၚတ်ဗှ် ဗ္ဒဟ်ညိမေတ္တာ၊ ယဝ်အဲဗၠေတ်မံၚ် ထ္ၜးဂၠံၚ်ပအ္စာ၊ ဇအ်သဝ်အောပ်မာ ဖျဝ်မာနဇဳ၊ မိက်ကဵုညးသွတ် လ္ၚတ်ဗှ်တီညဳ၊ ဗီုမန်ပ္တန်ဍုၚ် နွံကၠုၚ်သက်သဳ၊ တန်ဒှ်ညိဟာ၊ဟၚ်္သာတဟေၚ် ကေၚ်မိၚ်ဒၟံၚ်ကၠာ၊ သုဝဏ္ဏဘုံ ဒ္တုံသၞေဟ်က္ၜၚ်ကျာ၊ က္ဍိုပ်လေဝ်နှော်မံၚ် ညံၚ်စဲလက်ခါ၊ ဂွိၚ်တုဲဂွိၚ်ပၠန် ချူဇန်လၚ်္ကာ၊ ဗှ်တုဲဖအိုတ် စိုတ်ကဵုခၠၚ်အာ၊ တိတ်လေဝ်ကဵုသၠိၚ် လဟိၚ်သုခါ၊ နိမိတ်ခိုဟ်တွဵု ကဵုညာတ်လၟိုန်ခါ၊ ကဵုမြဟ်စိုတ်ထၟိက် တိက်က္တဵုသီုၜါ၊ အဲပတ္ထနာ ကဵုဗျာပ်အာညိ။

အတိတ်တေံပၠန် တိဇၟန်ဗၠဲမန်၊ သၟိၚ်အိန်နူသွဝ် ညာတ်လဝ်ဂၠိုၚ်သန်၊ ဂလာပိုၚ်အာ ဒှ်မိစ္ဆာဒ္တန်၊ သာသနာကျာ် ဂၠိုၚ်သာ်ကၠေံဗ္ဒန်၊ ဟိုတ်ဂှ်ညာတ်လဝ် နူသွဝ်စှေ်ပ္တန်၊ ပြိုၚ်ကေတ်ဇၞးရ နူဂလာပၠန်၊ ဗီုပြိုၚ်ကၠုၚ်ဂှ် ချူဗ္ဒဟ်ညိပၠန်၊ အတိုၚ်ဒှ် ကြက်ရှ်ဍန်ဍန်၊ ဂလာတံပၠန် စွံပ္တန်သက်သဳ၊ တၟံတိုၚ်ညးဂှ် ထပှ်ဟတ်ပ္ညဳ၊ သၞာံဂိတုစၟတ် ပုတ်ဂၠတ်စုတ်ဇဳ၊ ညးတိုပ်ခုန်ခဳ ဌာနဳဝွံဟေၚ်။

ကာလဍာ်ဒှ် စှ်ပိဖိဟ်ဟေၚ်၊ ကာလပြိုၚ်ပ္ကာန် ဌာန်ဂှ်ဗွဲလၟေၚ်၊ ညးတံဟေၚ်နွံ စွံတၟံတိုၚ်ကေၚ်၊ မန်တံဟွံမွဲ နဲဇၞးမာန်ပြေၚ်၊ သၟိၚ်အိန်ဟီုသၠောၚ် ပိုဟ်ကောၚ်ကၠာဟောၚ်၊ လုပ်စၞးကောန်မန် ထုဲခန်မိပ်ထေၚ်၊ မၞးတံစွံဂိုၚ် တၟံတိုၚ်သေၚ်လေၚ်၊ ပိုဟ်ဂှ်တိုၚ်ထဝ် သၟဝ်နဲတံပြေၚ်၊ ဃောဍာ်ဒှ် ၂၃ဖိဟ်ဟေၚ်၊ ခဲါဏောၚ်ဂွံတီ ခပ်သီဗွဲလၟေၚ်၊ တ္ၚဲယးတေံမ္ဂး ဒးအခိၚ်ဟေၚ်၊ ခဲါတုဲဒှ်သွံ ဂွံတီဇၞးတၟေၚ်၊ ဗ္တံဂှ်အိန်မၠာ် မတ်ဒိပ်ပါ်ထေၚ်၊ ဂလာတိုပ်ဂိုၚ် တၟံတိုၚ်စၟတ်ဟေၚ်၊ မန်ဟွံမွဲဏီ တီပြဟ်သေၚ်လေၚ်၊ နဣဒ္ဓိဂှ် ဗ္ဒဟ်စွံသၟတ်ပြေၚ်၊ သၟဝ်ဂလာခိုၚ် တိုၚ်ထဝ်မန်တၟေၚ်၊ ယးဂှ်စိုပ်ခိၚ် ပၚ်မှိၚ်ဟီုပြေၚ်၊ ဂလာတံခဲါ အာဲကၟာဲညးဟေၚ်၊ တိုၚ်ညးတိုပ်လဝ် မံက်ဂတဝ်ထေၚ်၊ တုဲဂှ်အိန်ဟီု အကြဳုမန်တၟေၚ်၊ ကောန်မန်ကေတ်ကွဵု ကဵုခဲါစှေ်ဟေၚ်၊ သၟဝ်ဂလာဂှ် စှ်ဖိဟ်စှေ်ရေၚ်၊ ညာတ်တၟံတိုၚ်ထဝ် သၠောၚ်သ္ပဝ်ဗွဲတၟေၚ်။

မန်တံပိုၚ်ဟေၚ် တၟေၚ်လောန်သန်ဏး၊ ဂလာဗုၚ်စံၚ် ညံၚ်ပံက်ကိုပ်ဂး၊ မုက်ကဝ်လ္ဒောဝ်ဝိုၚ် မန်ဂြိုၚ်ဟးဟး၊ သက်သဳညာတ်ရ ဒးကျဏောၚ်ဂး၊ ဂလာတံကျ ဂစိုၚ်က္ဍိုပ်ပြး၊ မန်တံညးအဲ မိပ်ဟၟဲပၟာဂး၊ တက်တဲယာဇိုၚ် အီဂြိုၚ်ဟးဟး၊ အီအိုတ်ခိုက်ဇဳ မဂဳထဴအး၊ ဝုတ်ဗၠာဲကောန်ၚာ် ထလာ်ယူပြး၊ နော်ဗျုလေဝ်ပါ ဟွံသာအိုတ်အး၊ မန်ရမန်ကီု ကြဳုလုံရးကး၊ တိမန်မန်ပိုၚ် ပြိုၚ်လဝ်ဂွံဇၞး။

တုဲဂှ်အိုတ်အး အိန်ဂးတိုန်ရ၊ ပ္တိုန်ဍုၚ်မန်ဏောၚ် သၠောၚ်သ္ပဝ်တိုန်ရ၊ ယဝ်တော်ရိုဟ်ဏာ သၞာံခါဝဿ၊ သာသၞာကျာ်ဂှ် လ္ၚီကၠံစှ်ပၠ၊ တြဴလေဝ်စုတ်ဗ္ဂပ် ထပ်စွံကြဴရ၊ ။(၁၁၁၆ သၞာံ)။ သက္ကရာဇ်ဍုၚ် ဟီုပ္ညုၚ်ဂတ၊ သၞာံတတိယ ပရိစ္ဆေဒ၊ မသုန်ကၠံပန်၊ ။(၅၀၄ သၞာံ)။ တ္ၚဲစန်နာံကၠ၊ မာ်မွဲစွေက်ဂှ် ဒှ်ရမာသ၊ သၟိၚ်အိန်သွဝ်ၜါ အ္စာကောန်မန်ရ၊ ပဓာတ်တၠစောန် ကောန်မန်ၜါရ၊ သမလကီု သီုဝိမလ၊ မအံက်ညးၜါ ဟီုအာညိရ၊ သိနဂၚ်္ဂါ ပိတာညးတၠ၊ ဝိမာလာကီု သီုဒေဝဳဂျ၊ မိအံက်သၟိၚ်မန် တန်အနန္တ၊ ပဓာန်ညးကၟိန် သၟိၚ်အိန်ခၞံရ၊ နဇုက်ဇၟန်ဗၠဲ အဝဲဂေါဝ်ပၠ၊ တၟာသတ်တလုဲ တုဲအိန်ရပ်ဆ၊ နတဲသ္တုံဟေၚ် ပတေၚ်လဝ်ရ၊ နူဌာန်ပ္တိုန်ဂိုၚ် တၟံတိုန်ထဝ်ပၠ၊ နမတ်သၟိၚ်အိန် ပအိန်ဇၞက်စ၊ နူဌာန်ၜိုပ်ထဝ် အသဝ်မူလ၊ ဗွဲဒိုဟ်ဗၟံက်ပြဲ ၜိုတ်မွဲဇုက်ဆ၊ အိန်ဒ္တူဒၟံၚ်တုဲ ဟွံတိုၚ်ဆုဲညိည၊ ဒၞာဲဂှ်ဟေၚ်စိုပ် တိုပ်တိုၚ်မွဲရ၊ နူဂှ်ပၠန်ဟေၚ် ပတေၚ်ဏာဂ္တ၊ အာကဵုသၟဝ်ကျာ ၜက်အာဌာန၊ စိုပ်ဗာယပ်ခိုၚ် တိုၚ်ဒုတိယ၊ နူဗာပ်ဟေၚ် က္လေၚ်ဗၟံက်ဌာန၊ က္လေၚ်ဨသာန်ဗိုၚ် တိုၚ်တတိယ၊ နူဨသာန်မှာ ပ္ၚောံအာဌာန၊ သမၠုၚ်ကျာဟေၚ် က္လေၚ်အဂၞဲဂျ၊ စိုပ်အဂၞဲပိုၚ် တိုၚ်စတုတ္ထ၊ နူအဂၞဲစတ် မှတ်ပလိုတ်ဂျ၊ နူပလိုတ်ရ အာနေရတိ၊ စိုပ်ဒၞာဲဝွံထဲ တိုပ်တိုၚ်ပ္ဍဲတိ၊ တိုၚ်ပဥ္စမ ဌာနဝွံစိ၊ နူတိုၚ်ဝွံစိ နေရတိဂှ်၊ ပ္ၚောံအာသၟဝ်ကျာ ပ္တဝ်ဏာဇုက်ဂှ်၊ နူသၟဝ်ကျာဟေၚ် ပတေၚ်ဏာသၟဟ်၊ အာကဵုတမ်ဇုက် ဟွံစုက်တမ်ဒှ်၊ ဇုက်အိုတ်လ္ဒောဝ်ဟေၚ် တၟေၚ်အံသဝ်ဒှ်၊ ဌာန်ဇုက်အိုတ်ဂှ် ဗ္ဒဟ်ယၟုမွဲကော်၊ ＂ဗလဲသ္ကုတ်＂ ယၟု ဗြုအာဇန်မြော်၊ ညးတၞံတံကော် တော်လဝ်လက်သဏ်၊ ဒၞာဲတိုၚ်အိန်တၞံ တံဇုက်အိုတ်သ္ကန်၊ ＂တိုၚ်ဂၞဲအိန်＂ကော် ကၞုက်ကၞာဲမြော်သန်၊ အိုၚ်ဂၞဲအိန်စိ မြိပတ်အာ၊ ဗွဲကြဴဒှ်ထဲ ဟိုတ်ဇြဲမတန်၊ ＂ဇြဲအိန်＂ညးဂးလုံရးပိုယ်မန်။

ခၞံဍုၚ်မန်ပၠန် တန်တုဲဒှ်အာ၊ သၟိၚ်အိန်သွဝ်ဂှ် မြဟ်လောန်စိတ္တာ၊ ဗွဲယၟုဍုၚ်တမ် ဟိုတ်တၞံၜိုပ်ၜါ၊ တိုၚ်ပျးဗုဒ္ဓါ ညီသာဟွံခၠန်၊ ဟံသာဝတဳ ခုတ်ပ္ညဳမွဲတန်၊ နကြဳဇှ်အိန် ကၟိန်ပြာသာဒ်နန်၊ နိမိတ်ဗ္ဒဟ်ကီု သီုထ္ၜိုၚ်ကၟာၚ်နန်၊ စဳရေၚ်က္တဵုဗ္ဒဟ် တုဲဒှ်အိုတ်ၠဴန်၊ ကြိဟာပသေက်ပေၚ်စေက်ဂၠိုၚ်တန်၊ သၟိၚ်အိန်ဇိုန်ကဵု တၚ်ဃဵုမိပ်သန်၊ သၟိၚ်မန်ညးၜါ တၠဌာနဒ္တန်၊ ဟံသာဝတဳ ဌာနဳဍုၚ်မန်၊ တုဲဂှ်အိန်စဴ တရဴသွဝ်ဒ္တန်။

အကြဳဍုၚ်မန် လောန်သန်ဒှ်စုၚ်၊ ပ္ဍဲစိုတ်ပိုဲတံ ဟွံလံဒှ်ကၠုၚ်၊ မိက်ကေတ်စရာဲ လောန်ကာဲခၞံဍုၚ်၊ ဟိုတ်ဂှ်ပိုဲသၟတ် ဆီခေတ်ပ္ဍဲဍုၚ်၊ ဆီနာဲဆီဗ္ကေတ် ဟွံလေဝ်ဗ္စံက်စုၚ်၊ ဍာဲခတ်လောန်ဗၞတ်ဒြဟတ်ပေၚ်စုၚ်၊ သၞာံလံၜိုန်ဒှ်ကြဳဇှ်မန်ဍုၚ်၊ တၟိဒၟံၚ်လၟိုန်ဟေၚ် ပေၚ်ထာတ်ဟွံသြုၚ်၊ ဟိုတ်ဂှ်ခုတ်လဝ် ယၟုအသဝ်သၠုၚ်၊ လိက်ဂျာနေဝ်မန် မွဲတန်ဒှ်ကၠုၚ်၊ ＂စရာဲၜိုပ်တၟိ＂ ဝိသေသဒုၚ်။

လျိုၚ်မန်မန်ဟေၚ် ယိုက်ဂၠေၚ်ပၞးစုၚ်၊ လိက်ပတ်ဂွံပြး လုံကးရးဍုၚ်၊ ကောန်မန်ဂွံဗှ် မြဟ်စိုတ်ကေဝ်သ္ဇုၚ်၊ လိက်မန်မန်ချူ ဂကူဂွံသၠုၚ်၊ လိက်မန်မန်ဗှ် ဒှ်ကြက်ဂကူသၠုၚ်၊ လိက်မန်မန်ကတ် ဒြဟတ်ပေၚ်စုၚ်၊ လိက်မန်မန်ပြး ပျးဂကူဍုၚ်၊ လိက်မန်မန်တက် လက်သဏ်စိုပ်ဍုၚ်။

ဟိုတ်သာ်ဝွံစုၚ် ဒုၚ်စေက်ဟွံဍောၚ်၊ ၜက်ကြုၚ်တတ်စောဝ် လဂေါဝ်မွဲတောၚ်၊ ပလက်တၟာဗိုၚ် စိုပ်ဇိုၚ်ဖေါၚ်ဖေါၚ်၊ ဌာန်သ္ၚောဲမန်တဴ လဴပူဟီုသောၚ်၊ ကေတ်နဲသ္ပကွး မတ်တၟးမိပ်သၠောၚ်၊ တမ်လိက်ပြးအာ ဌာနဂၠိုၚ်တောၚ်၊ ပကောံသြန်ဗွဝ် ဗဝ်စုတ်မိပ်သၠောၚ်၊ ရေၚ်တၠုၚ်သွ်ဂ္ကူ ဟွံဇူဟွံဍောၚ်၊ ဒှ်ဖဵုဂၠိုၚ်ရောၚ် ကျာ်သောၚ်တွံလဝ်၊ မ္ၚဵုလေဝ်က္ဍိုက်ပေၚ် လာဲလေၚ်ဂၠိုၚ်ဗဝ်၊ ညးဂၠေၚ်အဲဂၠေၚ် ဒလေၚ်ဓဝ်ဓဝ်၊ မွဲကေမ်မွဲမှိပ် ပေၚ်စိပ်ဒဵုဗွဝ်၊ ညံၚ်ကောန်မွဲဖဴ မွဲဂၞဴစွံလဝ်၊ စိုတ်သၟဟ်ဆီသၟဟ် ကဵုဒှ်ပတဝ်၊ ညးဒုန်အဲဂၠဟ် စိုပ်ပြဟ်ဒၞာဲပ္တဝ်၊ ဟိုတ်ဂှ်ပိုဲတံ တၟံဇဲပဓဝ်၊ ဟံသာဍုၚ်မန် နန်တၟိတိထဝ်၊ မွဲဂါံမွဲလၟာ် ကွာ်စဴဓဝ်ဓဝ်၊ ＂စရာဲၜိုပ်တၟိ＂စိုပ်တိနန်ထဝ်။

ကၞေဟ်
ကောဂၠု လေံဗိုတ်